मिस पविको १६ वर्षमै डिभोर्स

डडेलधुराकी पवित्रा साकी अहिले मिस पविको रुपमा चर्चित छिन् ।

सानैदेखि नाचगानमा रुचि राख्ने उनको मोडल बनिहाल्ने सपना थिएन तर टिकटकले उनलाई कलाकारिताको बाटो देखाइदियो । मीठो मुस्कानकी धनी मिस पवि ‘इनोसेन्ट’र आत्मविश्वासी लाग्छिन् । झण्डै डेढ दर्जन म्युजिक भिडियोमा आफ्नो सुन्दरता र अभिनय कौशल प्रदर्शन गरिसकेकी उनी अब कलाकारिताकै बाटोमा यात्रा गरिरहन चाहन्छिन् । उनको अबको सपना फिल्ममा अभिनय गर्नेछ ।

टिकटकमा डोटेली भाषा बोलेको भिडियोमार्फत चर्चा आएकी मिस पविको राजनीतिक सुझबुझ पनि निकै राम्रो हुन्छ । नयाँपुस्ताका राजनीतिज्ञले देशमा केही परिवर्तन ल्याउँछन् कि भन्ने उनको आशा छ ।

यस्तै, मिस पविले १६ वर्षको उमेरमै आफ्नो डिभोर्स भएको खुलासा गरेकी छन् । एक युट्युब अन्तर्वार्तामा उनले उक्त घटनापछि आफूले जीवनमा धेरै पाठ सिकेको बताइन् । कानूनीरुपमा विवाह नभएपनि वैवाहिक सम्बन्ध भने अलग भएको उनको भनाइ छ । ‘म उसलाई कहिल्यै पनि नराम्रो भन्न चाहन्न । जुन कुरा भएको थियो, सक्कियो । यसमा पछुतो छैन’उनले भनेकी छन्, ‘त्यहाँबाट धेरै कुरा सिक्न पाएँ । लाइफमा अघि बढ्नुपर्छ भन्ने कुरा सिकेँ ।’

डिभोर्सकै कुरामा अल्झिएर बस्न उचित नहुने उनको भनाइ छ । ‘डिभोर्सकै कुरामा बसेर रोइरहने, कराइरहने, उसले मलाई यस्तो गर्यो त्यस्तो गर्यो भन्ने त्यो चाहिँ हुनुहुँदैन’उनी भन्छिन् । बच्चा उमेरमै डिभोर्स भएको र अहिले बुझ्ने भएको उनको भनाइ छ ।

‘अहिले म २५ वर्षकी भएँ । अहिले धेरै कुरा बुझेजस्तो लाग्छ । त्यतिबेला नबुझेजस्तो । कतिपटक सुसाइड गर्ने प्रयास पनि गरेँ । जुन समाजबाट म आएकी छु, त्यहाँ त्यसरी हेरिन्छ’मिस पविले भनिन् ।

आफूले जीवनमा धेरै राम्रो कुरा गरेपनि मान्छेले नराम्रो कुरा मात्र कोट्याउने गरेको दुःखेसो उनले पोखिन् । ‘मैले लाइफमा राम्रो कुरा पनि गरेकी छु नि । मान्छे नराम्रो कुरालाई निकाल्न खोज्छन । मैले एसेप्ट गरे पनि नगरेपनि बच्चाको उमेरमा त्यस्तो भएको हो’उनले भनिन् ।

डिभोर्सको कुरालाई इंगित गर्दै उनले भनिन्, ‘त्यो घटना मेरो लाइफको ठूलो दशा थियो, जुन कट्यो ।’अहिले आउँदा त्यतिबेलाको कुरा सानो लाग्ने उनको भनाइ छ । अहिले पनि आफूसँग स्कुलका साथीहरू पनि साथमा नरहेको बताउँदै गर्दा उनले आँसु बगाइन् ।