बरिष्ठ फोटोग्राफर सुरेशराज शाक्यको दोस्रो एकल फोटो प्रदर्शनी ‘झिगु ख्वप’ सम्पन्न

 

प्रशन्न शाक्य

भक्तपुर / वरिष्ठ पत्रकार प्रशन्न शाक्यका अनुसार किपाः ग्राफी संघका अध्यक्ष तथा बरिष्ठ फोटोग्राफर सुरेशराज शाक्यको दोस्रो एकल फोटो प्रदर्शनी ‘झिगु ख्वप’ भक्तपुरको लिबालीस्थित वल्ड दरबार पार्टी प्यालेसमा यहि असाढ १ गते भव्य रुपले सम्पन्न भएको छ ।

शाक्यका अनुसार गत जेष्ठ ३० गते बाट शुरु भएको उक्त कार्यक्रम उद्घाटन गर्दै नेपाल मजदुर किसान पार्टीका अध्यक्ष एवं वरिष्ठ राजनीतिज्ञ नारायणमान बिजुक्छेँ ले पुराना सम्पदाहरू बचाइराख्न फोटोको ठुलो महत्व हुने र एउटा फोटोले पनि धेरै कुरा बताउने भएकोले दृश्यले धेरै कुरा बताउने धारणा राख्नु भएको थियो ।

यसै सन्दर्भमा उक्त कार्यक्रमका विशेष अतिथि बागमती प्रदेशका सांसद सुरेन्द्रराज गोसाईले फोटोग्राफीको महत्वबारे चर्चा गर्दै युवाहरुमा फोटोग्राफीको रुची बढाउनमा किपाःग्राफी भक्तपुरले गरेका कार्यको उनले प्रशंसा गर्नु भएको थियो । उहाँले फोटोग्राफीको महत्वबारे चर्चा गर्दै युवाहरूमा फोटोग्राफीको रूचि बढाउनमा किपाःग्राफी भक्तपुरले गरेको कार्य प्रशंसनीय भएको बताउनुभयो ।

यसैगरी सो कार्यक्रममा फोटो प्रदर्शनीलाई विभिन्न रूपले सहयोग गर्ने संस्था तथा व्यक्तित्वहरूलाई मायाको चिनो प्रदान गरिएको थियो । किपाः ग्राफी भक्तपुरका उपाध्यक्ष उज्वलचन्द्र बुद्धाचार्यले स्वागत मन्तव्य दिएको कार्यक्रममा सचिव बालकृष्ण प्रजापतिले सम्पूर्ण आगन्तुक तथा अवलोकनकर्ता लगायत उपस्थित पत्रकार, शिक्षक, युवा फोटो पत्रकार , फोटोग्राफर तथा समस्त पाहुनाहरुलाई धन्यवाद ज्ञापन गर्नु भएको थियो ।

पत्रकार शाक्यले  १०० भन्दा बढी तस्बिरहरू राखिएको उक्त प्रदर्शनी कार्यक्रमको अन्तिम दिन सम्ममा करिब ५ हजार जनाले अवलोकन गरेको बताउनु भएको छ । उहाँले कार्यक्रमको अन्तिम दिनमा भक्तपुर नगरपालिकाका प्रमुख सुनिल प्रजापतिले अवलोकन गरि कार्यक्रमको समापन गरिएको बताउनु भएको छ । नगर प्रमुख प्रजातिले फोटोग्राफर शाक्यद्वारा खिचिएका फोटोहरुले भक्तपुरको कला, संस्कृति, सम्पदा एवं रहनसहन झल्काउनुका साथै समग्र रूपमा भन्नुपर्दा  भक्तपुरको परिचय छोटो समयमै एकै स्थानबार हासिल गर्न सकिने भन्दै वधाई दिनु भएको शाक्यले जानकारी दिनुभएको छ ।